A continuidade do proxecto responde á boa acollida que tivo por parte de asociacións, concellos e centros educativos e ás demandas de recursos educativos de libre acceso, destinados á educación formal, informal e non formal, nos que se integran os contidos da exposición e da web. 

O proxecto insírese nos Obxectivos da Axenda 2030 da ONU para o Desenvolvemento Sustentable e tamén nas prioridades globais da UNESCO. Responde, en particular, aos seguintes obxectivos:

Obxectivo 4. Educación de calidade: para lograr unha educación inclusiva e de calidade, e un acceso á formación técnica para todas as persoas, como motor do desenvolvemento sustentable a fin de eliminar as disparidades de xénero e ingresos.

Obxectivo 5. Igualdade de xénero: para lograr a igualdade entre os xéneros e empoderar a todas as mulleres e nenas, e para rematar coa discriminación e a violencia que sofren as mulleres e as nenas en todos os lugares do mundo.

Obxectivo 14. Vida submarina. Conservar e utilizar de maneira sustentable os océanos, mares e recursos mariños. Os Obxectivos de Desenvolvemento Sustentable xeran un marco para ordenar e protexer os ecosistemas mariños e costeiros da contaminación terrestre, así como para abordar os impactos da acidificación oceánica. A mellora da conservación e o uso sustentable dos recursos oceánicos a través do dereito internacional tamén axudará a mitigar algúns dos retos aos que se enfrontan os océanos.

O obxectivo fundamental do proxecto foi o de elaborar recursos educativos abertos (REA) que permitirán:

• • Deseñar actividades que mostren a importancia do papel dos mares na sustentabilidade.
• • Amosar o papel das mulleres na sustentabilidade dos océanos, ameazados hoxe polo Cambio Ambiental Global, a través do coñecemento dos seus oficios seculares e de figuras de investigadoras notables na oceanografía e na conservación dos océanos.
• • Contribuír ao fomento de elección de estudos de Ciencia, Tecnoloxía, Enxeñaría e Matemáticas (STEM) entre as alumnas
• • Proporcionar recursos educativos a públicos diversos.
• • Participar na divulgación da Educación para a Sustentabilidade Oceánica, con perspectiva de xénero.

Para alcanzar estes obxectivos e aumentar a receptividade dos públicos, recorreuse a formatos dixitais (ilustracións, infografías,...), accesibles en liña desde diversos dispositivos dixitais, que permitan conectar con:

• Público en xeral

• Asociacións, ONGs, Concellos e centros educativos de todos os niveis

• Profesorado en formación do Grao en Educación Primaria, e do Grao en Educación Infantil, do Mestrado en Investigación e Innovación para Educación Infantil e Primaria, do Mestrado para profesorado de Educación Secundaria.

• Alumnado de Educación Infantil, Primaria e Secundaria

• Profesorado en exercicio de centros de Educación Primaria e Secundaria

• Profesorado universitario do ámbito educativo

Desde o panel de presentación, As mulleres do mar, a nosa protagonista Emma, unha nena moi curiosa e comprometida, convídanos a realizar un percorrido polas diferentes infografías e recursos educativos:

• - Os océanos. O planeta azul
• - Océanos en perigo. Ameazas para os océanos
• - Redeiras, salga e conserva. Oficios femininos centenarios
• - O marisqueo a pé. Un traballo de mulleres
• - Investigadoras mariñas. Saíndo da sombra.
• - Educación para a sustentabilidade. Sen perspectiva de xénero?

Ademais, na sección denominada EXPOSICIÓN, inclúense as fotografías dos paneis do proxecto “Achegas das mulleres á sustentabilidade do mar”, e unha recompilación de fotografías de mulleres do mar e das oceanógrafas Ángeles Alvariño González e Aida Fernández Ríos, cedidas por asociacións, coleccións particulares e o Museo Massó.

Para facilitar a navegación pola páxina, no pé da mesma pódense consultar o mapa da web, coas diferentes seccións e apartados que contén.